chlada

بسم الله الرحمان الرحيم

السلام عليكم و رحمة الله و بركاته

هاد شلاضات هما اللي درت فالعراضه دالعشاء لراجل اختي
هما بساط و عاديين و لكن انا قدمتهم بطريقتي الخاصه
و أتمنى تعجبكم

شلاضه الأولى:

كنقطعو الجزر طويل و الجلبانه و نديروهم يتبخرو فالكوكوط
الماء كنديرو فيه الأعشاب المنسمه حسب الذوق أنا درت ورقة سيدنا موسى
كنفرقو بينهم بورق الأليمينوم باش ميتخلطوش

نقشرو البطاطا ماشي الصغيرة بزاف (تكون شويه ما صغيره ما متوسطه )
و نزيدو عليها ورقة سيدنا موسى (تكون فالما و فوقها )

تنوجدو ابلي بالذره و الطون

نديرو الماء يغلي فكاسروله
و نزيدو عليه مقدار ابلي اللي بغينا انا درت زلافه و نصف
حيث كيكثر تبارك الله

منين يتسلق نصفيوه و نخلليوه على جنب حتى يبرد

نخلطو الذره و الطون بالزيت ديالو و نزيدو عليهم ابلي بعدما برد و شويه دالكاشير محكوك

و نخلليوهم حتى للوقت فاش نبغيو نقادو الأطباق عاد باش نديرو ليه التتبيله و هي :
ابزار ابيض+ الملح+ الزيت + الخل + شويه ديال المايونيز

كناخدو التوست و نطبعو قطع حسب الذوق

نسلقو 2 بيضات و نطحنوهم مع علبة ديال الطون + المايوينز + الكيتشاب و وشويه
دالملح و البزار ابيض
و نغطيو قطع التوست اللي طبعنا بهاد الخليط

صورت هادشي غير فالكوزينه
طبعا راكم فاهمين علاش

كنعمرو زلافه بخليط ابلي و نقلبوها فالطبق
و نحطو شويه دالجزر و شوية الجلبانه و 2 بطاطات
و نوجدو التتبيله و هي :
الربيع مقطع+ ضرس ثومه مطحون مزيان + الزيت بلديه +الكمون+ الملح + البزار ابيض+ الخل
نخلطو كلشي مزيان
و ندوزو خويط منها من الوسط على الخضر
و نحطو قطع التوست فالجناب و فوق ابلي
و نقطعو الخيار عريض شويه باش نديرو منو كيسان صغار
نحفروهم من الوسط بلا منوصلو للقاع و نعمروهم بالخليط ديال الطون و البيض
و نزوقوهم بالزيتون اخضر ب عظم مقسوم و معمر بالكيتشاب

شلاضه الثانيه

هي عاديه بزااااااف

علبة ذره / طماطم و خيار مقطعين فنفس حجم الذره
بصيله خضاريه صغيره مرققه / الربيع مقطع

منين كنوجدو كلشي و حتى نبغيو نقدموها عاد باش نديرو ليها التببيله
و هي : ملح زيت /زيتون / خل او حامض / البزار (ماشي ضروري )
و زرقتها بوردات و قطع ديال قلب النخيل

شلاضه الاولى قدمتها مع هاد الطبسيل دالكفته
و الثانيه مع الدجاج مشويه بالياغورت غادي نزل طريقتو فقسم الطبخ المغربي و العالمي